Feeste bei de redaksie van www.adegem.be :
vandeweke wordt doir de 1000ste edissie van Pol Veirmans “Gazedde van Oigem” gepubliceerd!
(V.l.n.r.: John Maenhout, Geert De Baets, Marnix Van de Kerckhove, David Storm en Pol Veirman)
Al 1000 weken lank lukt journalist Leopold (‘Pol’) Veirman derin van zijn lezers alle zondagnechtijen te trekteren op nieuws over de gemeente “buiden de wireld”. Een serjeuze prestoissie, woirdan zijn honderden vaste wekelijkse lezers hem terechte dankboir meuën vuern zijn.
De website www.adegem.be wordt gemaukt deur een antal vreiwilligers, dien in febrewoirie 2003 op ’t gedacht kwammen van de gemeente Oigem op d’eletrieke weireldkoirte te zedden. Pol Veirman kwamt al in novembere van da joir als vaste man de ploeg vervoeën en hee zorgt sedertdien alle weken vuer de “Gazedde”.
Veel Oigemnaars uit de gemeente zelve en uit de ‘diaspora’ (in Belgen en in guel de wireld!) vonnen vree rap de weg noir hulder wekelijkse gazedde, uek deur tefrente artikels van Pols collega’s in de ploitselijke en in de regionoile gazedden en op de televieze, dien boftegen op zijn wirk.
Vandauë den dag keut “De Weke van Pol Veirman” rekenen op een publiek van omtrent 750 vaste lezers, dien alle zondauen “hulder” Oigems Nieuws kommen lezen.
In al die joiren heet Pol moir twie keers nuedgedwooën verstek moeden loiden goin, en wel vuer gegronde redens: in novembere van ’t joir 2021 wierd hee een teike geveld deur de Corona.
Moir 2021 wois uek vuer andere redens hoist rampzoileg vuer de redaksie: den 5den oktobere is Udo Tjalsma, de man diet al van in 2003 guel vuer niet de website op zijn servers ondergebrocht hoit, botszelfs gestorven. Zijn bedrijf, “DynamiXS Internet”, wierd doirdeure stillegeleid en de mannen van de redaksie moesten zere op zoek noir een nieë onderkomste. ’t Vroeëre webadres adegem.NET wierd in janewoirie 2022 veranderd in adegem.BE en de site verhuisdege noir een nieë – van deze keer spijdeg genoeg betoilende – lokoissie.
De redaksie van adegem.be heet nui alleszinste were een goed uuë op de toekomste en z’hobben danze hulder lezers nog guel lank keunen ‘bedirven’ mee nieuws en nog veel andere artiekels over hulder geliefde gemeente Oigem!
PS : lees onze 1000ste Gazette in het Nederlands op:
https://nieuws.adegem.be/wp-content/uploads/2023/01/1000.pdf