Adegems Nieuws
Gazette van Adegem - Gazedde van Oigem Pol Veirman

Achter tien joir nog altijd geen deurebrauke in den dossier van de Weie!

Tien joir achter d’eeste informoissievergoirije vuer d’inweunders van de Weie over den anleg van dubbele riolen en van een nieë bestroidije, zit den dossier nog altijd muerdevaste omdan der een antal inweunders zijn dien nie t’akkord zijn mee de plans diet ’t gemeentebestier hulder vuerngesteld heet.

In april van ’t joir 2013 riept ’t schepencollege van Maldegem d’inweunders van de Weie tegoire in Den Huuën Pad vuer hulder de plans vuer een dubbele riole en een nieë bestroidije vuern te stellen. Specioil an de Weie is dan al d’eienoirs van een perseel grond in die stroidde uek eienoire zijn van ’t stik stroidde da vuer hulder doenije ligt…

Wanordelijk
D’eeste informoissievergoirije in 2003 verliept in ’t guel nie al t’ordentelijk: van dan der een antal inweunders van de Weie op de plans zauen dan ze vreiwilleg een deelke van huldere grond gijen moeden afstoin vuer de riole en de nieë stroidde te keunen anleien en dan der in sommegte delen van de Weie grachten gijen komen, wois’t prijs. Der wois geen sprauke nie meer van van echte informoissie, ’t wierd een spel van roeben en ruize mauken.

Anpassijen
’t Schepencollege hoit wel huere noir ’t gruetste deel van de klachten van d’inweunders en gauft an den buro van d’architekten dien de plans opgemaukt hoin den opdracht dan ze hulder ontwirp moesten anpassen. Een poir moinden loiddere wieren d’inweunders were g’inviteerd vuer een vergoirije. Een deel van d’inweunders kosten hulder wel vinnen in d’anpassije van de plans, moir vuer een klein groepke van d’inweunders vielt der doir nog altijd nie over te klabben.

Nieuw bestier
’t Schepencollege probeerdege overeen te kommen mee de mensen dien nie t’akkord woiren mee de plans, moir da gijng niet. ’t Nieuw schepencollege, dat in 2019 ’t roer van de gemeente overgepakt heet, is ter uek nie in gelukt van overeen te kommen mee de teeënstanders van de plans.

Verleden joir in febrewoirie kwamt der weere een ves bestier. Schepenen Danny Vannevel (N-VA) gijngt in gesprek mee d’inweunders van de Weie en probeerdege van op die maniere mee alleman overeen te keunen kommen. Der wieren were nieë plans getekend, dien een antal dijen oplostegen, moir der kwamt een nieuw probleem mee de nieë reuilijne van de Weie.

Nieuw overleg
Der kwammen were tefrente reklamoissies binnen op de gemeente over ’t ontwirp mee de nieë reuilijne. “’t Meeste poirt van die reklamoissies hemme keunen oplossen. Der zijn zuuste nog ijnkele mensen dien hulder verzedden teeën d’uitvoerije van ’t plan. Me goin thuebbe mee de studieburo nonnekeer klabben mee de mensen dien bei hulder gedacht blijven. ’t Is t’hobben dan die gesprekken vuer een deurebrauke keunen zorgen, damme den dossier vandejoir nog keunen afronnen en damme een nieë riole en een nieë bestroidije keunen anleien in de Weie”, liet schepenen Vannevel ons weden.

De mensen dien nog altijd bezwoiren hen zijn ’t akkord vuer der nonnekeer over te klabben…


PS : lees onze 1000ste Gazette in het Nederlands op:
https://nieuws.adegem.be/wp-content/uploads/2023/01/1000.pdf