Binst dan de bestieren van KSK Maldegem en KVK Oigem an ‘t onderhandelen woiren onze meuëlijks nie thuebbe kosten smelken, paktege Excelsior Donk sebiet noir de zwoire middels…
Vuer te keunen overleven mee zijn 6 ploeën heet Excelsior Donk der zelve vuern gekozen van te degraderen noir de 4de provincioile A. Der worn geen speelders niemmer angetrokken dien ne grueddere winstpriem krijen dan d’andere speelders en bei ‘t opstellen van de ploeën moen d’entrijneurs vuerrank geven an speelders uit d’eiene streke.
Omdan d’algemene kosten en de priems van de speelders en d’entrijneurs alsan dierder worn en omdat ’t alsan lasteger wordt van geldschieders te vinnen, krijen meer en meer amateurvoetbalploeën ’t altmoir moeëlijkere van hulder huefd boven ’t woider t’haaën. Bei Excelsior Donk hen ze gekozen vuer de zwoire middels.
“Me stonnen twie joir leen vuer een hervormije van ’t bestier. Ik woire greed vuer de nieë vuerzidder te worn, op condiesse dat der serieus zoe gesnoeid worn in d’uitgauven. Ons neeënkobbeg bestier heet tons beslist van vreiwilleg te degraderen noir de 4de provincioile, van al de te diere entrijneurs en speelders huldere vreidom te geven en van ons eien jonk volk meer keure te geven van te spelen”, verteldege de nieë vuerziddere Patriek Cloiys.
Nen nieë start
De maniere van peizen van ’t nieuw bestier wierd op een vergoirije bekend gemaukt an de speelders en d’entrijneurs. Lijk da’t verwacht wiere zijn al de speelders vuer wien dan de priems ’t meeste teldegen opgestept uit de klub. Een klein deel van de kirn van den eeste ploeg wois greed vuer mee te stebben in de nieë start van de klub.
“Rabber dan damme verwacht hoin wiern der speelders uit de beloften en juniors in ’t eeste elftal gedropt. Al die bei de klub betrokken is wois ter zeker van damme in ’t eeste joir nie al te veel sportieve podden gijen breken. Me kreeën veel gollen teeëne en men hoildegen weineg punten. Doirteeënovere stond der dat der bei ons ne ploeg van moidden op ’t plein stonne.
Me zijme nui hauverweeë ’t nieuw sezoen. D’ambianse binnen de klub is nog altijd 100 ten 100 en der zijn al ijnkele ploeën dien ondervonnen hen dat onze ploeg mee tefrente jooë gasten tussen de 16 en d’18 joir al firm vueruit gegoin is. Da beloft vuer de noiste joiren.
De voiders en de moeders van onze jeugdspeelderkes zijn uek mee mee ons nieë maniere van doen en me wirken goed thuebbe mee ‘t gemeentebestier”, gijngt vuerzidder Cloiys vuers.
Verlede weke vrijdag organizeerdege Excelsior Donk zijn nieuwjoirsrecepsie. De pertan gruedde kantiene zoit labbende vol. De gruedde diskoers wieren achterweeë geloiden. Vuerzidder Cloiys is ter preus op dat Excelsior Donk were finansieel gezond is en dan der vuer de toekomste ijnkele nieë geldschieders beigekommen zijn.
PS : lees onze 1000ste Gazette in het Nederlands op:
https://nieuws.adegem.be/wp-content/uploads/2023/01/1000.pdf